आपल्या स्वंयपाकघरात आणि अवती भोवती अनेक प्रकारच्या वस्तू आणि वनस्पती आहेत. एक वनस्पती म्हणून त्यांची आपल्याला माहिती असली तरीही एक औषधी म्हणून आपल्याला त्याची काहीच माहिती नसते. आपल्या स्वंयपाक घरात विशेषतः मसाल्याच्या पदार्थात वापरले जाणारे लसून, कांदे, हिंग, मुळठी, लवंग, मिरे, आले, ओवा, जिरे, दालचिनी हे सारे मसाले औषधी आहेत. स्वंयपाकघरात वापरले जाणारे गहू, मका यासारखी धान्ये आणि कडधान्येही औषधी आहेत. आपल्या भोवतालच्या परिसरात असलेल्या लिंबू, कडूलिंब, तुळस, पुदिना यासारख्या वनस्पती आणि सफरचंद, आवळा, जांभूळ, चिकू, केळी, डाळींब, सीताफळ यासारखी मोसमी फळे या सर्वांतच अनेक प्रकारचे औषधी गुणधर्म ठासून भरलेले आहेत.

​

बुहेतक आजारांवर आपल्या घरातीलच औषधी वनस्पतींचा वापर करण्याची आपली खूप प्राचीन पंरपरा आहे. घरातील कोणाही व्यक्तीला काही आजार झाला किंवा घरातील कोणीही आजीकडे काही दुखत असल्याची तक्रार केली की आजी आपला बटवा सोडून त्यातून काही तरी औषधी काढायची आणि उपचार करायची. आजीच्या ओषधाने अशा प्रकारचे अनेक आजार गायब झाल्याचा अनुभव बहुतेकांनी घेतला आहे.

घरातील आजीला पंरपरेने माहीत असलेले घरगुती औषधांच्या उपचाराचे हे ज्ञान कुटुंब व्यवस्थेतून आज आजी गायब झाल्यामुळे लुप्त व्हायला लागले आहे. ही परंपरा जोपासण्यासाठी आणि तिचे जतन करण्यासाठी म्हणून आजार आणि त्यावरील घरगुती औषधांचे रामबाण उपचार याची माहिती आम्ही आपल्या कुटुंबाला निरोगी ठेवण्यासाठी आणि दीर्घायू करण्यासाठी देत आहोत.