कोकणवासियांसाठी मोठी बातमी; रेल्वे प्रशासनाने सुरू केली 'ही' विशेष गाडी
कोकणात सुट्टीसाठी जाणाऱ्या प्रवाशांसाठी आजपासून (२१ नोव्हेंबर) पनवेल ते मडगाव ही विशेष रेल्वे गाडी चालवण्याचा निर्णय घेतला आहे. ख्रिसमस व नववर्षाच्या पार्श्वभूमीवर रेल्वेगाड्यांना होणारी संभाव्य गर्दी टाळण्यासाठी मध्य रेल्वेने हा निर्णय घेतला आहे. दरम्यान, रेल्वे प्रशासनाने घेतेलल्या या निर्णयामुळे प्रवाशांना मोठा दिलासा मिळाला आहे.
आजपासून ३ जानेवारीपर्यंत दर रविवारी पनवेल ते मडगाव ही विशेष रेल्वे सुरु करण्यात आल्याने प्रवाशांकडून समाधान व्यक्त केलं जात आहे. ०१५९६/०१५९५ ही रेल्वे गाडी मडगाव येथून सायंकाळी ४ वाजता सुटेल आणि पनवेल येथे दुसऱ्या दिवशी मध्यरात्री ३ वाजून १५ मिनिटांनी पोहोचेल. तर पनवेल येथून दर सोमवारी सकाळी ६ वाजून ५ मिनिटांनी सुटून त्याचदिवशी सायंकाळी ६ वाजून ४५ मिनिटांनी मडगावला पोहोचेल.
या विशेष रेल्वेला रोहा, माणगाव, खेड, चिपळूण, सावर्डे, संगमेश्वर, रत्नागिरी, आडवली, राजापूर, वैभववाडी, कणकवली, सिंधुदुर्ग, कुडाळ, सावंतवाडी, थिविम, करमाळी आदी स्थानकांवर थांबे देण्यात आले आहेत.