"तो" आदेश चुकून निघाला – निर्मला सीतारमन

नव्या आर्थिक वर्षाच्या सुरुवातीलाच केंद्रीय अर्थ मंत्रालयाकडून लहान बचत योजनांमध्ये व्याजकपात जाहीर करण्यात आली होती. त्यामुळे सर्वसामान्यांतून नाराजी व्यक्त केली जात असतानाच अर्थमंत्री निर्मला सीतारमन यांनी "हा आदेश चुकून निघाल्याचं" सांगत व्याजदर जैसे थे राहतील असं स्पष्ट केलं आहे. निर्मला सीतारमन यांनी ट्विट करत ही माहिती दिली आहे.

काय होता निर्णय –

नव्या आर्थिक वर्षाच्या पहिल्या तीन महिन्यांसाठी (१ एप्रिल ते ३० जून २०२१) नवे व्याजदर जाहीर करण्यात आले होते. सार्वजनिक भविष्यनिर्वाह निधीवरील (पीपीएफ) व्याजदर ०.७ टक्क्याने कमी करून ६.४ टक्क्यांवर, पोस्टाच्या बचत खात्यावरील व्याज वार्षिक ४ वरून ३.५ टक्के, एक वर्षांच्या मुदतठेवींवरील व्याजदर ५.५ वरून ४.४ टक्के तर ज्येष्ठ नागरिकांच्या बचत योजनांवरील व्याज ७.४ वरून ६.५ टक्के करण्यात आले होते. राष्ट्रीय बचत प्रमाणपत्रावरील व्याजदर ६.८ वरून ५.९ टक्के तर किसान विकासपत्रांवरील व्याजदर ६.९ टक्क्यांवरून ६.२ टक्के करण्यात आले होते. सुकन्या समृद्धी योजनेचेही व्याजदर कमी करण्याचा निर्णय घेण्यात आला होता.